عشرة نصائح للمهندسين حديثي التخرج

عشرة نصائح للمهندسين حديثي التخرج

دي عشر نصائح مهمه جدا من مهندس تنفيذي بينقل تجاربه وخبراته للمهندسين حديثي التخرج من بداية التخرج لحد ما تشتغل في موقع واول يوم ليك في الموقع ازاي يكون وطريقة الشغل في المواقع

الاولى : وانت بتدور على شغل لو مش معاك واسطه ابدء بالشركات المتوسطه ودي هتلاقيها بتشتغل مع الحكومة زي الجامعات الكبيرة بيكون فيه ادارات هندسيه في الجامعه روح اسال فيها عن الشركات الكويسة اللي بتتعامل معاها وشوف شركة يكون صاحبها مهندس مش مجرد مقاول هتستفاد جدا لانها بتكون بتشتغل في كذا حاجه زي الانشاءات والتشطيبات والترميمات وغيرها

الثانية : صدقني مش مهم المرتب 💰💰قد ايه في الاول الاهم انك تاخد خبرة هتتعب جدا في الاول بس اتثبت وجودك وبعدها اطلب المرتب اللي نفسك فيه وانت واثق من نفسك وهتاخده والكلام دا عن تجربه ولو تم الموافقه عليك من صاحب الشركة خليه يديك فكرة عامه عن الموقع اللي انت رايح له وفين اللوح وكدا

الثالثه : اول يوم ليك في الموقع سلم على الناس كلها واتعرف عليهم كلهم سواء عمال او مشرفين معاك او صنايعية وخلافه وخليك متواضع معاهم وبلاش موضوع انك مهندس وترسم نفسك عليهم والكلام دا صاحبهم احسن 👍 🙋

الرابعه : لو لقيت فيه مهندس قديم في الموقع يبقى حظك حلو خلي علاقتك حلوة معاه واتعلم منه وخليك زي ظله بس بحدود علشان ميتخنقش منك لو ملقتش هتلاقي مشرف برضه هتتعلم منه بلاش تتكبر 👷

الخامسه: بلاش قعدة المكتب او الكرفان مش هتعلمك حاجه اقعد وسط الموقع وسط الصنايعية والعمال علشان تعرف مصطلحاتهم وطريقة شغلهم ازاي هتسمع مصطلحات اول مره زي "طالوش ومنجفره وطفشه ولتظانه وكرتبونه وغيرها "🎿

السادسه : المعلومه اللي تعرفها من صنايعي او مشرف او سمعتها او شوفتها تعالى الانترنت ودور عليها اتاكد منها او صورها بالموبايل 🌁 📹وارفعها هنا واسال عليها هتلاقي ناس كتير تفيدك هنا هيبقى تعليم نظري وعملي

السابعه : بعد ما تبدأ تتعلم مصطلحات وتاخد على جو الشغل هتبدأ تدي تعليمات للصنايعية او العمال يعملوها اتاكد بنفسك منها انها اتعملت واتعملت صح متكتفيش بكلامهم واوعى تزعق و تهزأ وتغلط في عامل او صنايعي صدقني انت اللي هتبقى خسران العقاب دايما يكون بالفلوس مش قلة الادب 💸💸💸

الثامنه: في الغالب بعد فتره لما تثبت نفسك هتكون انت كل مهندسي الموقع اللي المفروض انهم يكونوا معاك في مهندس واحد حاجه ميكس كدا بمعنى انه المفروض يكون فيه مهندس حصر ومهندس مدني ومهندس معماري وكهربا ومكتب فني ..... متتخضش عادي هتستفاد بس بلاش تفتي في حاجه انت مش فاهمها عرف الاستشاري بتاع الحاجه لو محترم انك مش فاهمها وهو هيفهما لك 👷👷

التاسعه: هيكون من الاسباب الرئيسية اللي قبل صاحب الشركه انه يوظفك علشانها وانت مش معاك خبره انك تعمل حصر كميات للمشروع وان شاء الله هيكون فيه بوست منفرد لخبرات مهندس الحصر بس في نقاط سريعه "احصر البنود اول باول واستخدم الكمبيوتر راجعها اول باول مع الاستشاري المختص.... 🛃📖

العاشرة: بيكون فيه حاجه اسمها مقايسه دي مهمه جدا لازم تكون معاك وتحفظها هي والرسومات علشان تشتغل بيها وتطبقها صح لان بيكون فيها بنود الاعمال المطلوب منك تنفذها فساعات ممكن يطلب منك انك تعمل بند مش عندك في المقايسه زي مثلا الارضيات نازله عندك بلاط والاستشاري قالك تعملها رخام او طريقة تنفيذ بند زي الكيرتن وول متوصف انه طبقة زجاج واحده وهو طلبه طبقتين تنبه لدا

دي بسرعه كدا نقاط كان لازم تعرفها كمهندس حديث التخرج مش كل حاجه طبعا لكن حاجات مهمه وان شاء الله احاول اعمل بوستات تانيه لخبرات الحصر والموقع وياريت لو سمحتم اللي عنده حاجه يضيفها علشان كلنا نستفاد من بعض

م/محمد السيد